लोणी काळभोर प्रतिनिधी – मतदार यादीच्या विशेष संक्षिप्त पुनर्निरीक्षण (SIR) मोहिमेअंतर्गत आपल्या विभागातील बूथ लेव्हल अधिकारी (BLO) घरोघरी जाऊन मतदारांची पडताळणी करीत आहेत. तथापि, अनेक मतदार भाड्याच्या घरात वास्तव्यास असल्याने वारंवार स्थलांतर करत असतात. तसेच, BLO भेटीच्या वेळी काही मतदार कामानिमित्त किंवा इतर कारणांमुळे घरी उपलब्ध नसण्याची शक्यता असते. त्यामुळे अशा मतदारांचे पुनर्निरीक्षण राहून जाण्याची शक्यता निर्माण होऊ शकते. त्यासाठी वंचित मतदारांसाठी शेवटचे तीन दिवस विशेष सुविधा केंद्र सुरू करावे हवेली तालुका शिवसेना (उबाठा गट ) अध्यक्ष स्वप्नील कुंजीर यांनी तृप्ती कोलते-पाटील
सहायक मतदार नोंदणी अधिकारी तथा अपर तहसीलदार तृप्ती कोलते-पाटील यांच्या कडे केली आहे .
SIR मोहिमेच्या समाप्तीपूर्वीचे अंतिम तीन दिवस प्रत्येक गावामध्ये किंवा संबंधित कार्यक्षेत्रात जिल्हा परिषद शाळा, ग्रामपंचायत कार्यालय, तलाठी कार्यालय अथवा अन्य योग्य सार्वजनिक ठिकाणी विशेष सुविधा केंद्र निश्चित करण्यात यावे. या ठिकाणी संबंधित BLO दिवसभर उपस्थित राहतील, अशी व्यवस्था करण्यात आल्यास ज्या मतदारांचे पुनर्निरीक्षण राहून गेले असेल, त्यांना तेथे प्रत्यक्ष उपस्थित राहून आवश्यक फॉर्म भरता येतील व त्यांची पडताळणी पूर्ण करता येईल.
यामुळे एकही पात्र मतदार मतदार नोंदणी प्रक्रियेपासून वंचित राहणार नाही तसेच SIR मोहिमेची प्रभावी आणि सर्वसमावेशक अंमलबजावणी होण्यास मोठी मदत होईल.
तरी, वरील सूचनेचा सकारात्मक विचार करून आवश्यक ती कार्यवाही करावी अशी मागणी स्वप्नील कुंजीर यांनी केली आहे .
