वीज, उन्नत मार्ग आणि रेल्वेच्या भूसंपादनाचे प्रश्न ऐरणीवर
लोणी काळभोर प्रतिनिधी – : शिरूर-हवेली विधानसभा मतदारसंघाचे आमदार माऊली आबा कटके यांच्या उपस्थितीत कुंजीरवाडी येथे जनता दरबाराचे आयोजन करण्यात आले. या जनता दरबाराला हवेलीतील नागरिकांनी प्रचंड प्रतिसाद दिला .यावेळी परिसरातील नागरिकांनी विविध नागरी समस्या आणि प्रलंबित प्रश्न मांडले. यामध्ये प्रामुख्याने वीजपुरवठ्याशी संबंधित समस्या, उन्नत मार्गासाठी होणारे भूसंपादन तसेच रेल्वे प्रकल्पाच्या भूसंपादनासंदर्भातील प्रश्नांवर नागरिकांनी आपली भूमिका मांडली.
यावेळी हवेली पंचायत समितीचे सभापती युवराज काकडे , हवेली तालुका राष्ट्रवादी काँग्रेसचे ( अजित दादा गट ) अध्यक्ष दिलीप वाल्हेकर ,कृषी उत्पन्न बाजार समितीचे संचालक प्रशांत काळभोर , सुदर्शन चौधरी , कुंजीरवाडीचे माजी सरपंच सचिन तुपे ,लोणी काळभोरचे प्रसाशकीय सरपंच नागेश काळभोर , तरडेचे माजी सरपंच मारुती बरकडे ,लोणी काळभोरचे माजी उपसरपंच राजेंद्र काळभोर ,साधना सहकारी बँकेचे संचालक बापूसाहेब बोरकर ,उद्योगपती माऊली नारायण काळभोर , विकास सोसायटीचे माजी चेअरमन विठ्ठल काळभोर , युवराज काळभोर ,सतिश काळभोर ,संजय काळभोर ,नबाजी रुपनवर , सुहास चौधरी ,किरण कुंजीर , चंपकलाल गवते ,निळकंठ काळे , संतोष घोलप व नागरिक मोठ्या संख्येने उपस्थित होते.
पूर्व हवेली परिसरात विविध विकासकामे आणि पायाभूत सुविधांसंदर्भातील प्रश्नांमुळे नागरिकांना अनेक अडचणींचा सामना करावा लागत आहे. या पार्श्वभूमीवर आयोजित करण्यात आलेल्या जनता दरबारात स्थानिक नागरिकांच्या समस्या जाणून घेण्यावर आमदार माऊली आबा कटके यांनी भर दिला .
वीजपुरवठ्याच्या प्रश्नाकडे लक्ष वेधले
सध्या पुर्व हवेलीतील अनेक गावामध्ये वीजपुरवठा आणि त्यासंदर्भातील अडचणींचा मुद्दा जनता दरबारात मांडण्यात आला. शेती, व्यवसाय आणि दैनंदिन जीवनासाठी वीज महत्त्वाची असल्याने वीजविषयक समस्या लवकरात लवकर सोडविण्याची अपेक्षा नागरिकांकडून व्यक्त करण्यात आली. वीजपुरवठ्याशी संबंधित अडचणींवर संबंधित यंत्रणेने लक्ष देण्याची गरजही यावेळी कृषी उत्पन्न बाजार समितीचे संचालक व सोरतापवाडीचे माजी सरपंच सुदर्शन चौधरी यांनी अधोरेखित केली व तसे निवेदन सोरतापवाडी व परिसरातील नागरिकांनी आमदार माऊली आबा कटके यांना दिले .यावेळी सुदर्शन चौधरी यांनी पूर्व हवेलीत सतत जाणाऱ्या विजय विषयी आमदार माऊलीआबा यांना संपूर्ण माहिती दिली आमदार माऊली आबा यांनी याविषयी अधिकाऱ्यांना सांगून येथून पुढे २४ तास वीजपुरवठा सुरळीत राहील व लवकरच विजेचा प्रश्न सुटेल अशी ग्वाही दिली.
उन्नत मार्गाच्या भूसंपादनाचा प्रश्न चर्चेत
लवकरच हडपसर ते यवत पर्यंत उन्नत मार्ग सुरू होणारा असून त्यासाठी भूसंपादनात बऱ्याच त्रुटी असल्याचे लोणी काळभोर परिसरातील नागरिकांनी आमदार माऊली कटके यांना दाखवून दिल्या . परिसरातील प्रस्तावित उन्नत मार्गासाठी करण्यात येणाऱ्या भूसंपादनाचा विषयही जनता दरबारात उपस्थित करण्यात आला. या प्रकल्पासाठी जमीन संपादित करताना संबंधित जमीनमालकांचे प्रश्न, जमिनीचा मोबदला आणि भूसंपादनाची प्रक्रिया याबाबत नागरिकांना स्पष्टता मिळणे आवश्यक असल्याचे मत मांडण्यात आले.यावेळी कृषी उत्पन्न बाजार समितीचे संचालक प्रशांत काळभोर , प्रशासकीय सरपंच नागेश काळभोर , लोणी काळभोरचे माजी उपसरपंच राजेंद्र काळभोर , विठ्ठल चेअरमन ,बापू बोरकर ,माऊली काळभोर यांनी याविषयी आमदार माऊली आबा यांना सांगताच त्यांनी लवकरच शेतकरी व अधिकाऱ्यांची बैठक घेऊन हा प्रश्न मार्गी लावण्याचे आश्वासन दिले. विकास प्रकल्पांना गती मिळतानाच बाधित जमीनमालकांच्या अडचणींचे निराकरण होणे आणि त्यांना नियमानुसार योग्य मोबदला मिळणे महत्त्वाचे असल्याने या प्रश्नाकडे गांभीर्याने लक्ष देण्याची मागणी यावेळी करण्यात आली.
रेल्वेच्या भूसंपादनाबाबतही प्रश्न उपस्थित
रेल्वे प्रकल्पासाठी होणाऱ्या भूसंपादनासंदर्भातील प्रश्नही नागरिकांनी आमदारांसमोर मांडले. नायगाव ,सोरतापवाडी परिसरातील जमीन संपादनाची प्रक्रिया, मोबदल्याबाबतची स्पष्टता आणि संबंधित शेतकरी व जमीनमालकांच्या अडचणी यांसारख्या मुद्द्यांवर चर्चा करण्यात आली. रेल्वेच्या भूसंपादनामुळे प्रभावित होणाऱ्या नागरिकांना योग्य माहिती मिळावी आणि त्यांच्या प्रलंबित प्रश्नांवर तोडगा निघावा, अशी अपेक्षा यावेळी व्यक्त करण्यात आली.
म्हातोबाची आंळदी येथील कचरा प्रश्न गंभीर
यावेळी म्हातोबाची आळंदी येथे पुणे महानगरपालिकेचा कचरा टाकला जात असल्याचे सचिन माथेफोड यांनी निदर्शनास आणून देताच आमदार माऊली आबा यांनी ग्रामसेवक एस खाडे यांना तसे पत्रक देण्याचे सांगितले .नागरिकांना या कचऱ्याचा कसलाही त्रास होता कामा नये असे खाडे यांना सांगितले .
नागरिकांच्या प्रश्नांवर तोडगा निघण्याची अपेक्षा
जनता दरबाराच्या माध्यमातून नागरिकांना आपल्या समस्या थेट लोकप्रतिनिधींसमोर मांडण्याची संधी मिळाली. वीजपुरवठा, उन्नत मार्ग आणि रेल्वेच्या भूसंपादनासारखे प्रश्न स्थानिक नागरिकांच्या दृष्टीने महत्त्वाचे असल्याने संबंधित विभागांनी या प्रश्नांचा पाठपुरावा करून त्यांचे निराकरण करावे, अशी अपेक्षा यावेळी नागरिकांनी व्यक्त केली आहे.
