मांजरी व शेवाळेवाडी येथे सुविधांचा अभाव
निवडणूकीवर बहिष्कार घालण्याची मतदार राजाची तयारी
हडपसर प्रतिनिधी – प्रभाग रचना जाहीर होताच सोशल मीडियावर उमेदवारांचा प्रचाराचा धडाका सुरु झाला असुन हडपसर जवळील मांजरी ,शेवाळेवाडी येथील नेतेमंडळींनी वेगवेगळ्या प्रकारे सोशल मिडीयावर प्रचार सुरु केला आहे .आपणच कसे योग्य ते सोशल मिडीयावर चालू आहे .
महापालिका निवडणुकांसाठीची प्रारूप प्रभाग रचना जाहीर होताच इच्छुकांनी मतांची गणिते मांडायला सुरुवात केली असून, सोशल मीडियाच्या माध्यमातून प्रचाराचा जोरदार धडाका लावला आहे.पण गावातील रस्त्याकडे कुणाचेही लक्ष दिसत नाही . त्यामुळे रस्त्यांची वाट लागली असुन नेतेमंडळींनी मात्र निवडणूकीचा घाट घातल्याची चर्चा नागरिकांमध्ये आहे .
शेवाळेवाडी येथून मांजरीला जाण्यासाठी मधला मार्ग म्हणजे दिपकनगरचा रस्ता (दरडीचा रस्ता ) . हा रस्ता मांजरी रेल्वे पुलाशेजारुन जात आहे . मांजरी बाजुने सुरुवातीला येथे महापालिका शाळेसमोरच रस्त्यावर मोठा खड्डा पडला असुन त्या मध्ये पाणी साठल्यामुळे वाहन चालकांना खड्डा पाण्यामुळे दिसत नसल्याने येथे वाहने जोरात आपटत आहेत .अनेक वाहनांचे यामुळे नुकसान झाले आहे . मुलांना जातांना सुद्धा खुप कष्ट घेऊन शाळेत जावे लागते .पुढे येथून जाताना अनेक ठिकाणी गतिरोधक असुन जवळपास पंचवीस गतिरोधकावरुन जावे लागते .आणि आता तर या रस्त्याची चाळण झाली असुन रस्त्यावर अनेक ठिकाणी खड्डे पडले आहेत. चांगला रस्ता फक्त नावापुरताच राहीला आहे .नागरिक येथून जाताना रस्ता शोधत आहेत .पण त्यांना रस्ता न दिसता नुसते खड्डेच दिसत आहेत .या रस्त्यावर अनेक मोठ्या सोसायटयांचे गृहप्रकल्प आहेत . तसेच दोन इंटरनॅशनल शाळा सुद्धा या रस्त्यावरच आहेत. त्यामुळे नागरिकांबरोबर विद्यार्थ्यांना सुद्धा या रस्त्याने जाताना अनेक अडचणींचा सामना करत खड्डे चुकवत स्कूल चले हम असे म्हणावे लागते . त्यातच वाहनचालकांना वाहन चालवताना खुपच त्रास होत आहे . या रस्त्यावरुन जाताना मार्ग काढणे अतिशय त्रासदायक होत आहे .
दुसरा खड्डेमय रस्ता म्हणजे पुणे – सोलापूर महामार्गावरून मोरे वस्तीवरून पुणे – अहिल्यानगर महामार्गाला जोडणारा रस्ता होय . पुणे -सोलापूर महामार्ग सोडल्यास येथून जाताना अनेक ठिकाणी आपल्याला खड्डे दिसतात तसेच बऱ्याच ठिकाणी कचऱ्याचे ढीग येथे साठलेले असून नागरिकांना एका हाताने नाकाला रुमाल धरावा लागतो तर एका हाताने खड्डे चुकवत वाटचाल करावी लागते . येथून नदीचा पूल ओलांडून थेऊर ,केसनंद ,आव्हाळवाडी , कोलवडी ,वाडे बोल्हाई ,वाघोली अशा अनेक गावांना या रस्त्याने जाता येते . पुणे – अहिल्या नगर महामार्ग वर जायला हा रस्ता जवळचा आहे परंतु येथे अनेक ठिकाणी खड्डे पडल्यामुळे नागरिकांची वाट बिकट होत चालली आहे. याबाबत दरडी व मोरे वस्ती येथील नागरिकांशी चर्चा केली असता रस्ता जर नाही झाला तर निवडणूकीवर बहिष्कार घातला जाईल असा इशारा दिला .
शेवाळेवाडी येथे तर फाटयावरच ड्रेनेजचे अनेक दिवस पाणी वाहत होते त्यानंतर महानगरपालिकेने एक चेंबर करून व तेथे साफसफाई करून पाणी रस्त्यावर यायचे बंद केले पण चेंबर शेजारी असणारा खड्डा व राडारोडा तसाच असून त्याकडे कोणाचेही लक्ष नाही . द्राक्ष बागेशेजारील चौकात पण ड्रेनेजचे पाणी अनेक दिवस वाहत होते तेथे सुद्धा एक खड्डा घेऊन तो खड्डा जसेच्या तसाच आहे .मग जनतेच्या सुविधेसाठी नेतेमंडळी निवडणूक लढवीत आहेत की स्वतःच्या फायदयासाठी अशी चर्चा नागरिकांमध्ये आहे .
प्रभाग क्रमांक १५ मांजरी ब्रुदुक – साडेसतरा नळी येथील उमेदवारांची अंदाजे संख्या
शेवाळेवाडी सर्वपक्षीय उमेदवार अंदाजे ६ , साडेसतरा नळी अंदाजे ७ उमेदवार मांजरी अंदाजे १० ते १२ उमेदवार ,केशवनगर अंदाजे ५इच्छुक उमेदवार सोशल मिडीयावर प्रचार करताना दिसत असुन काही ठिकाणी तर पती व पत्नी हे दोघे सोशल मिडीयावर प्रचार करताना दिसत आहेत .
