लोणी काळभोर प्रतिनिधी -रयत शिक्षण संस्थेचे एस. एम. जोशी महाविद्यालय, हडपसर, पुणे येथील कला शाखेच्या प्रथम वर्ष विद्यार्थ्यांसाठी शैक्षणिक वर्ष २०२६–२७ निमित्ताने आयोजित इंडक्शन कार्यक्रम गुरुवार, दि. ३० जुलै २०२६ रोजी उत्साहपूर्ण वातावरणात संपन्न झाला.
कार्यक्रमाच्या प्रारंभी प्रा. डॉ. दिनकर मुरकुटे यांनी विद्यार्थ्यांचे स्वागत करून महाविद्यालयाची गौरवशाली परंपरा, अभ्यासक्रम, राष्ट्रीय शैक्षणिक धोरण तसेच कला शाखेतील विविध शैक्षणिक संधींची माहिती दिली. यावेळी महाविद्यालयाचे प्राचार्य प्रा. डॉ.एकनाथ मुंढे यांच्या हस्ते कला विभागातील प्राध्यापकांचा सत्कार करण्यात आला.
कार्यक्रमाचे प्रमुख मार्गदर्शक प्राचार्य प्रा.डॉ. एकनाथ मुंढे यांनी विद्यार्थ्यांना मार्गदर्शन करताना सांगितले की, १०७ वर्षांची गौरवशाली परंपरा लाभलेल्या रयत शिक्षण संस्थेच्या एस. एम. जोशी महाविद्यालयात सुमारे पाच हजार विद्यार्थी शिक्षण घेत असून ग्रामीण व शहरी भागातील विद्यार्थ्यांसाठी हे महाविद्यालय गुणवत्तापूर्ण शिक्षणाचे प्रभावी केंद्र आहे.
यावेळी त्यांनी राष्ट्रीय शैक्षणिक धोरण अंतर्गत उपलब्ध शैक्षणिक संधी, गुणवत्तापूर्ण अध्यापन, संशोधनाभिमुख शिक्षण, क्रीडा, सांस्कृतिक उपक्रम, NCC, NSS, विद्यार्थी विकास योजना, स्पर्धा परीक्षा मार्गदर्शन केंद्र, समृद्ध ग्रंथालय, प्लेसमेंट सेल तसेच विविध कौशल्यविकास उपक्रमांची सविस्तर माहिती दिली. विद्यार्थ्यांनी अभ्यासाबरोबरच व्यक्तिमत्त्व विकास, कौशल्यवृद्धी आणि सामाजिक बांधिलकी जोपासत महाविद्यालयातील विविध उपक्रमांमध्ये सक्रिय सहभाग घ्यावा, असे आवाहन त्यांनी केले. तसेच विद्यार्थ्यांना उत्कृष्ट शैक्षणिक वातावरण, आधुनिक सुविधा आणि उज्ज्वल करिअरसाठी आवश्यक सर्व प्रकारचे मार्गदर्शन उपलब्ध करून देण्यासाठी महाविद्यालय कटिबद्ध असल्याचे त्यांनी स्पष्ट केले.
कार्यक्रमाचे प्रास्ताविक व सूत्रसंचालन डॉ. छाया सकटे यांनी केले, तर आभार प्रदर्शन डॉ. संजय जगताप यांनी केले.
या कार्यक्रमास महाविद्यालयातील सर्व प्राध्यापक, शिक्षकेतर कर्मचारी तसेच प्रथम वर्ष कला शाखेचे विद्यार्थी मोठ्या संख्येने उपस्थित होते. इंडक्शन कार्यक्रमामुळे नवागत विद्यार्थ्यांना महाविद्यालयाची शैक्षणिक परंपरा, विविध विभाग, सुविधा आणि करिअरच्या संधींची सर्वांगीण ओळख मिळाली.
