लोणी काळभोर प्रतिनिधी – लोहपुरुष सरदार वल्लभभाई पटेल यांची १५० वी जयंती व राष्ट्रीय एकता दिनाचे औचीत्य साधुन पोलीस आयुक्त पुणे शहर यांच्या आदेशानुसार तसेच पोलीस उप आयुक्त परिमंडळ ५ पुणे शहर यांच्या मार्गदर्शनाखाली लोणी काळभोर पोलीस ठाण्याच्या वतीने दि. ३१/१०/२०२५ रोजी सकाळी ०७/०० वा. एकता दौड (RUN FOR UNITY) चे आयोजन करण्यात आले होते.
या एकता दौडमध्ये लोणी काळभोर परिसरातील जेष्ठ नागरिक, पूर्व हवेली असोसिएशनचे डॉक्टर्स, महाराष्ट्र केसरी पै. राहुल काळभोर, उपमहाराष्ट्र केसरी भरत मस्के, मुंबई महापौर केसरी पै. दत्तात्रय (आबा) काळे, नॅशनल बॉक्सर चॅम्पियन कु. सृष्टी विजय जाधव ,त्याचप्रमाणे लोणी काळभोरचे सरपंच नागेश काळभोर , व परिसरातील सरपंच, उपसरपंच , नागरिक, पत्रकार, खेळाडू, डान्स अकॅडमीचे विद्यार्थी, पंचक्रोशीतील बचत गटाच्या महिला तसेच लोणी काळभोर पोलीस स्टेशन, हडपसर वाहतूक विभाग व पोलीस अधिकारी व अंमलदार यांनी सहभाग घेतला होता.
सुमारे ९८० सदस्य सदर एकता दौडमध्ये सहभागी झाले होते. त्यापैकी पुरुष ६७२ व ३०८ महिला सदस्य सहभागी झाल्या होत्या. या एकता दौड सुमारे ३ कि. मी. अंतराची ठेवण्यात आली होती. सकाळी ०७/०० वा. लोणी काळभोर पोलीस ठाणे येथुन प्रथम पुरुष गटाची व नंतर महिला गटाची अशा दोन स्वतंत्र एकता दौड घेण्यात आल्या. कदमवाकवस्ती येथील पालखी मैदान एकता दौडचे अंतीम टोक होते. या एकता दौड मध्ये सहभागी झालेल्या सदस्यांपैकी ज्यांनी दौड पुर्ण करुन प्रथम आले अशा पुरुष गटातुन व महिला गटातुन प्रत्येकी ३ क्रमांक पंचांचे निवडीणे काढण्यात आले व त्यांना राष्ट्रीय स्तरावर क्रिडा पुरस्कार विजेते खेळाडु यांच्या हस्ते ट्राफी, मेडल व सन्मानचिन्ह देवुन गौरविण्यात आले.
पारितोषीक वितरणानंतर शालेय विद्यार्थ्यांचा विवीध गुणदर्शनपर कार्यक्रम पार पडला. त्यानंतर एकता दौडच्या माध्यमातुन सरदार वल्लभभाई पटेल यांचे जिवनचरीत्र व त्यांचे अमुल्य व ऐतिहासिक कामगिरीबाबत वरिष्ठ पोलीस निरीक्षक राजेंद्र पन्हाळे यांनी माहिती दिली. त्यानंतर प्रमुख पाहुणे व मान्यवरांनी आपले मनोगत व्यक्त केले. कार्यक्रमाचे आभार प्रदर्शन पोलीस निरीक्षक (गुन्हे) स्मिता पाटील यांनी केले . राष्ट्रगीताने या कार्यक्रमाची सांगता करण्यात आली.
आजपर्यंतच्या इतिहासात लोणी काळभोर पोलीस ठाण्याच्या हद्दीत अशाप्रकारचे उत्कृष्ठ व नियोजनबध्द कार्यक्रमाचे आयोजन पोलीस प्रशासनाच्या वतीने पहिल्यांदाच करण्यात आले असल्याची चर्चा, लोणी काळभोर व पंचक्रोषीतील नागरीकांमध्ये आहे. या कार्यक्रमाच्या माध्यमातुन राष्ट्रीय एकता, सार्वभौमता व जातीय सलोखा याचे उत्तम दर्शन घडले. त्याबाबत सर्वत्र लोणी काळभोर पोलीसांचे तसेच पुणे शहर पोलीस दलाचे कौतुक केले जात आहे.
