लोणी काळभोर प्रतिनिधी – हवेली तालुक्यात पार पडलेल्या जिल्हा परिषद व पंचायत समिती निवडणूक प्रक्रियेत मनुष्यबळ विभागाच्या नियोजनबद्ध व शिस्तबद्ध व्यवस्थापनामुळे संपूर्ण प्रक्रिया शांततेत, सुरळीत व यशस्वीरीत्या पूर्ण झाली.
निवडणूक निर्णय अधिकारी डॉ. यशवंत माने, सहाय्यक निवडणूक अधिकारी अर्चना निकम व तृप्ती कोलते यांच्या मार्गदर्शनाखाली मनुष्यबळ कक्षाने मतदानपूर्व तयारी, मतदान दिवसावरील व्यवस्थापन व मतदानोत्तर प्रक्रिया प्रभावीपणे हाताळली. मतदान केंद्रांवरील कर्मचारी नियुक्ती, बदली, उपस्थिती नोंद, आकस्मिक परिस्थितीतील व्यवस्थापन तसेच तक्रारींचे तात्काळ निराकरण या सर्व बाबींमध्ये मनुष्यबळ विभागाची भूमिका अत्यंत महत्त्वाची ठरली.
या संपूर्ण प्रक्रियेत मनुष्यबळ कक्षाचे नोडल अधिकारी प्रमोद भांड यांच्या सोबत साहिर सय्यद, धम्मदिप सातकर,प्रदीप शेलार, नितीन पायगुडे, विक्रांत पोकळे, उमेश धावडे, दत्तात्रय दुधाने यांनी जबाबदारीने व कार्यतत्परतेने काम केले. त्यांच्या समन्वयपूर्ण कामामुळे निवडणूक यंत्रणेला मोठा आधार मिळाला.
दरम्यान, माध्यम अधिकारी प्रा. योगेश हांडगे, राम कारंडे यांनी मनुष्यबळ कक्षामार्फत करण्यात आलेल्या कामकाजाची माहिती वेळोवेळी माध्यमांपर्यंत अचूक व प्रभावीपणे पोहोचविली, त्यामुळे प्रशासनाच्या कार्याची पारदर्शक मांडणी माध्यमांतून शक्य झाली.
निवडणूक निर्णय अधिकारी यांनी मनुष्यबळ विभागाच्या कामगिरीचे विशेष कौतुक करत, “नियोजन, वेळेचे पालन आणि समन्वय यामुळे निवडणूक प्रक्रिया निर्भेळपणे पार पडली,” असे नमूद केले. एकूणच हवेली तालुक्यातील निवडणूक प्रक्रिया मनुष्यबळ विभागाच्या सक्षम व्यवस्थापनामुळे यशस्वी ठरली, अशी प्रतिक्रिया प्रशासनाकडून व्यक्त करण्यात आली.
