लोणी काळभोर प्रतिनिधी – हवेली तालुक्यातील जिल्हा परिषद व पंचायत समिती निवडणूक प्रक्रिया शांततापूर्ण, पारदर्शक आणि शिस्तबद्ध वातावरणात पार पाडण्यासाठी मतदानाच्या दिवसापासून प्रशासनाने वाहन व वाहतूक व्यवस्थापनावर विशेष लक्ष केंद्रीत केले आहे. राज्य निवडणूक आयोगाच्या मार्गदर्शक सूचनांनुसार मतदानाच्या दिवशी वापरण्यात येणाऱ्या सर्व शासकीय, निमशासकीय तसेच खाजगी वाहनांचे नियोजन काटेकोरपणे अंमलात आणण्यात आले आहे.
मतदान पथकांना वेळेत मतदान केंद्रांवर पोहोचविण्यासाठी पूर्वनियोजित वाहतूक आराखड्यानुसार वाहने उपलब्ध करून देण्यात आली आहेत. जिल्हा आपत्ती व्यवस्थापन आराखड्याचा विचार करून तयार करण्यात आलेल्या या वाहतूक योजनेमुळे दुर्गम व ग्रामीण भागातील मतदान केंद्रांपर्यंत पथकांची वाहतूक सुरळीत पार होणार आहे. मतदारसंघनिहाय वाहनांचे प्रकार व आवश्यक संख्येचे नियोजन करून संबंधित सहाय्यक निवडणूक निर्णय अधिकारी (ARO) यांना त्यानुसार वाहन व्यवस्था उपलब्ध करून देण्यात आली आहे.
मतदान प्रक्रियेदरम्यान सेक्टर अधिकारी, फ्लाइंग स्क्वॉड (FST), व्हिडिओ सर्व्हेलन्स टीम (VST) तसेच स्थिर देखरेख पथकांसाठी (SST) स्वतंत्र वाहन व्यवस्था करण्यात आलेली आहे. यासोबतच झोनल अधिकारी व साहित्य वाटप पथकांसाठी आवश्यकतेनुसार वाहने उपलब्ध करून देण्याचे सविस्तर नियोजन करण्यात आले आहे.
EVM ( इलेक्ट्रॉनिक मतदान मशीन ) वाहतुकीसाठी निवडणूक आयोगाच्या प्रोटोकॉलनुसार लोखंडी कंटेनरचा वापर करण्यात येणार असून, EVM वाहतूक करणाऱ्या सर्व शासकीय व खाजगी वाहनांवर GPS यंत्रणा कार्यान्वित करण्याचे नियोजित आहे. त्यामुळे मतदान यंत्रांच्या हालचालींवर सतत लक्ष ठेवणे शक्य होणार आहे. EVM वाहतुकीसाठी आवश्यक ट्रक व टॅम्पोची स्वतंत्र व्यवस्था देखील करण्यात आली आहे.
मतदानाच्या दिवशी वापरण्यात येणारी सर्व वाहने सुस्थितीत व स्वच्छ असल्याची खात्री करूनच ती निवडणूक प्रक्रियेत वापरण्यात येणार आहेत. तसेच वाहनचालक, कंडक्टर व सहाय्यक यांची मतदार यादीतील नोंदणी माहिती आधीच संकलित करून संबंधित अधिकाऱ्यांकडे उपलब्ध करून देण्यात आली आहे.
ही संपूर्ण वाहन व वाहतूक व्यवस्थापनाची जबाबदारी नोडल अधिकारी अमित रनवरे यांच्या मार्गदर्शनाखाली पार पाडण्यात येत असून, सहाय्यक अधिकारी शेखर शिंदे, अनुराधा सवाई, महेश मगरे, अश्विनी कुलकर्णी, स्मिता बगाटे, प्रियांका शिंगाडे, सरस्वती पोंदे, मैथिली माने, माधुरी माने,धम्मदिप सातकर,भूमेश मसराम, हे अधिकारी व कर्मचारी या कामकाजात सक्रिय सहभाग घेत आहेत. निवडणूक प्रक्रियेबाबतची माहिती व प्रशासनाच्या उपाययोजनांचे समन्वय साधण्याची जबाबदारी माध्यम अधिकारी प्रा. योगेश हांडगे पाटील यांच्याकडे सोपविण्यात आली आहे.
मतदानाच्या दिवशी संपूर्ण हवेली तालुक्यात वाहन व्यवस्थापन व वाहतूक नियंत्रण प्रभावीपणे राबवून कोणताही अनुचित प्रकार घडू न देता निवडणूक प्रक्रिया सुरळीत पार पाडण्याचा प्रशासनाचा निर्धार असल्याची माहिती प्रशासनाकडून देण्यात आली आहे. तसेच राज्य निवडणूक आयोगाच्या मार्गदर्शक तत्त्वांनुसार पुढील मतमोजणी प्रक्रियेसाठीही अशीच दक्षता घेण्यात येणार आहे.
