लोणी काळभोर प्रतिनिधी – संत तुकाराम महाराजांची पालखी उदया लोणी काळभोर ,कदमवाकवस्ती येथील पालखी मैदानावर ग्रामीण भागातील पहिल्या मुक्कामासाठी येत असुन पालखी सोहळ्याच्या पार्श्वभूमीवर लोणी काळभोर महावितरण शाखेकडुन आवश्यक तयारी पूर्ण करण्यात आली आहे. पालखी मार्गावरील वीजवाहिन्या, रोहित्रे (ट्रान्सफॉर्मर), विद्युत खांब आणि इतर विद्युत यंत्रणांची तपासणी करण्यात आली असून संभाव्य बिघाड टाळण्यासाठी आवश्यक दुरुस्तीची कामे पूर्ण करण्यात आली आहेत. अतिरिक्त ट्रान्सफॉर्मर २०० किलो-व्होल्ट-अँपिअर बसविण्यात आला आहे .पालखी मैदानात ३ गाळे अंडरग्राउंड केबल टाकली आहे .
वारकऱ्यांना अखंड आणि सुरक्षित वीजपुरवठा मिळावा यासाठी महावितरणने विशेष पथके तैनात केली आहेत. आपत्कालीन परिस्थिती हाताळण्यासाठी अधिकारी व कर्मचारी २४ तास सज्ज ठेवण्यात आले असून नियंत्रण कक्षही कार्यरत आहेत. पालखी मार्गावरील मुक्कामस्थळी तसेच प्रमुख ठिकाणी वीजपुरवठा सुरळीत राहण्यासाठी विशेष नियोजन करण्यात आले आहे.महावितरणने नागरिक आणि वारकऱ्यांना तुटलेल्या वीजतारा, विद्युत खांब किंवा इतर धोकादायक परिस्थिती दिसल्यास तत्काळ महावितरणला माहिती देण्याचे आवाहन सहाय्यक अभियंता विक्रांत ओहोळ यांनी केले आहे .
उपकार्यकारी अभियंता महेश धावडे यांच्या मार्गदर्शनाखाली सहाय्यक अभियंता विक्रांत ओहोळ, मुख्य तंत्रज्ञ बाळासाहेब सायकर , सचिन मखर ,अजय डोंगरे, मुस्तफा शेख ,अबू सय्यद , सिराज सय्यद ,अमोल शेलार ,योगेश गाडेकर ,अक्षय पाटील , रोहित काळभोर ,पांडुरंग खरात हे सर्व परिस्थितीवर लक्ष ठेवून आहेत.
