मांजरी येथील अपघाताबाबत संतप्त नागरिकांचा सवाल
लोणी काळभोर प्रतिनिधी – महादेवनगर ते मांजरी रस्त्यावर काल दिनांक १३ डिसेंबर २०२५ रोजी अपघात एका मुलाचा मृत्यू झाला .याला जबाबदार असणाऱ्या प्रशासना विरोधात नागरिकांनी प्रतिक्रिया देऊन अजुन किती जीव गेल्यावर प्रशासन जागे होणार असा सवाल केला .मांजरी रस्त्यावरील बेकायदा पार्किंग व पथारीवाले याबाबत प्रशासन अजूनही हातावर हात ठेवून बसलेले आहे. रस्त्याच्या कडेला उभ्या असलेल्या गाडयाबाबत प्रशासन मात्र निर्णय घेण्यात उदासीनता दाखवत आहे. दिवसेंदिवस रस्त्यावरील वाहतूक वाढत असून प्रवाशांना कोंडी होऊन मोठ्या अपघातांना सामोरे जावे लागत आहे. या बेकायदेशीर पार्किंग मुळे शनिवारी एकाचा जीव गेला .आणिआता अजुन किती जीव गमावल्यावर प्रशासन जागे होणार ?असा संतप्त सवाल नागरिकांकडून केला जात आहे.
महादेव नगर ते मांजरी रस्त्याचे काँक्रिटीकरण व रुंदीकरण झाल्यानंतर या रस्त्याच्या दोन्ही बाजूला वाहने पार्किंग केली जात आहेत.तसेच फुटपाथवर विक्रेते असल्यामुळे फुटपाथवरुन चालणे मुश्कील झाले आहे . दुचाकीपासून अवजड वाहनापर्यंतची सर्व प्रकारची वाहने रात्रंदिवस आळीपाळीने येथे उभी असतात. त्यामुळे रस्ता रुंद होऊनही वारंवार वाहतूक कोंडी होत आहे. तसेच जागजागी डिव्हाडर फोडुन येण्यासाठी व जाण्यासाठी रस्ता केल्याने अचानक वाहने रस्त्यावर घुसतात .प्रशासनाचा धाक न राहिल्याने रस्ता वाहतुकीत मोठे अडथळे निर्माण होत आहेत. पादचारी, ज्येष्ठ नागरिक, महिला, शालेय विद्यार्थी व कामगार यांना जीव मुठीत घेऊन मार्ग काढावा लागत आहे. चौरंग स्मितशिल्प सोसायटी समोरील रस्ताही सार्वजनिक बांधकाम विभागाच्याच ताब्यात आहे. मात्र, त्याठिकाणच्या रस्त्यावरील अनाधिकृत पार्क केलेल्या वाहनांवर वाहतूक पोलिसांकडून तशी कोणतीही कारवाई किंवा पार्किंग नियोजन त्यापुढील रस्त्यावर होत नाही. अशी तक्रार अनेक नागरिकांनी केली .याबाबत हडपसर वाहतूक शाखेचे वाहतूक पोलिस निरीक्षक राजेंद्र करणकोट यांनी सांगितले की महानगरपालिकेने फुटपाथवरील पथारीवाले यांच्या वर कारवाई करण्यासाठी आम्ही वेळोवेळी सांगितले आहे .बेकायदेशीर पार्किंग बाबत लवकरच कार्यवाही करण्यात येईल .
याबाबत गेली दीड वर्षे राष्ट्रवादी युवक काँग्रेसचे प्रदेश उपाध्यक्ष अजित घुले यांनी सांगितले की पार्किंग बाबत महानगरपालिका व वाहतूक पोलीस यांना सतत पत्रव्यवहार केला आहे . याशिवाय नागरिकांना बरोबर घेऊन वाहतूक पोलिसांना पत्र दिले आहे. “महादेवनगर – मांजरी रस्ता दोन्हीही बाजूने लावलेल्या गाडयांमुळे अरूंद झाला आहे. त्यामुळे या रस्त्यावर सतत वाहतुककोंडी होऊ लागली आहे. येथे सम – विषम तारखेनुसार पार्किंगचे नियोजन होणे किंवा नो पार्किंग झोन करणे आवश्यक आहे. त्यासाठी वाहतूक पोलिसांना दोन वेळा नागरिकांच्या सह्यांचे निवेदन दिले आहे. सार्वजनिक बांधकाम विभाग, महापालिका व पोलिस प्रशासनाने समन्वय साधून लवकरात लवकर येथील पार्किंगचा प्रश्न सोडवावा अन्यथा आंदोलनाशिवाय पर्याय राहणार नाही.
दबक्या आवाजात चर्चा
फुटपाथवरील व्यावसायिकांकडुन महानगरपालिकेचे काही कर्मचारीपैसे घेत असल्याची चर्चा नागरिकांमध्ये असुन त्यामुळे फुटपाथवर व्यवसाय वाढुन त्यांचे रुपांतर वाहतूक कोंडीत होऊन अपघात होत आहेत .
