लोणी काळभोर प्रतिनिधी – कदमवाकवस्ती येथे खड्ड्यात पडून दुर्दैवी मृत्यू झालेल्या चिमुकल्या कु. सोहम लखन कसबे (वय २ वर्षे) यांच्या कुटुंबाची हवेली पंचायत समिती सभापती युवराज हिरामण काकडे यांनी भेट घेऊन कुटुंबीयांचे सांत्वन केले. यावेळी सभापती युवराज काकडे यांनी, शिरूर-हवेलीचे आमदार ज्ञानेश्वर उर्फ माऊली आबा कटके यांच्याशी दूरध्वनीद्वारे चर्चा करून, या दुःखद घटनेची माहिती दिली. तसेच मृत चिमुकल्याच्या कुटुंबाला, मुख्यमंत्री सहायता निधीतून विशेष बाब म्हणून आर्थिक मदत मिळण्यासाठी शासनाकडे प्रस्ताव पाठविण्याबाबत विनंती केली. यावर आमदार कटके यांनी त्वरित प्रशासनाशी समन्वय साधून, आवश्यक ती कार्यवाही करण्याच्या लेखी सूचना दिल्या.
यानंतर सभापती युवराज काकडे व पंचायत समितीचे सदस्य अमोल टेकाळे यांनी घटनास्थळासह संपूर्ण ओढ्याची प्रत्यक्ष पाहणी केली. भविष्यात अशा प्रकारच्या दुर्घटना टाळण्यासाठी, ओढ्यालगत संरक्षक भिंत, आवश्यक सुरक्षा व संबंधित उपाययोजना करणे तसेच संपूर्ण पालखीतळ परिसराचा नियोजनबद्ध आराखडा तयार करणेकामी, आमदार ज्ञानेश्वर कटके यांच्या पुढाकाराने मुख्यमंत्री देवेंद्र फडणवीस, उपमुख्यमंत्री सुनेत्रा पवार व एकनाथ शिंदे यांची लवकरच भेट घेणार असल्याचे सांगितले.
या दुर्घटनेची पुनरावृत्ती होऊ नये व नागरिकांच्या सुरक्षिततेला सर्वोच्च प्राधान्य द्यावे तसेच येणाऱ्या वारकऱ्यांच्या दृष्टीने आवश्यक उपाययोजना, तातडीने राबविण्यासाठी स्थानिक ग्रामपंचायत प्रशासनाने सकारात्मक भूमिका घ्यावी, असे मत सभापती युवराज काकडे यांनी व्यक्त केले. यावेळी स्थानिक ग्रामस्थ व पदाधिकारी उपस्थित होते.
