लोणी काळभोर – रयत शिक्षण संस्था, कर्मवीर विद्याप्रबोधिनी यांच्या मार्फत पद्मभूषण डॉ. कर्मवीर भाऊराव पाटील राज्यस्तरीय महाविद्यालयीन प्रश्नमंजूषा स्पर्धा-२०२५ चे आयोजन एस. एम. जोशी कॉलेज, हडपसर येथे शुक्रवार दि.१७ जानेवारी २०२५ रोजी करण्यात आले होते. यावेळी कार्यक्रमाचे उद्घाटक म्हणून हडपसर गुन्हे विभागाचे पोलीस निरीक्षक अमर काळंगे व प्रमुख पाहुणे म्हणून पोलीस उपनिरीक्षक धनंजय गाडे उपस्थीत होते. विद्यार्थ्यांना मार्गदर्शन करताना अमर काळंगे म्हणाले की, विद्यार्थ्यांना जीवनात यशस्वी होण्यासाठी कायम शिकत राहण्याची आवश्यकता आहे. तसेच विद्यार्थ्यांनी मोठी स्वप्ने पाहून सामाजिक कार्य करावे. असे मत पोलीस निरीक्षक अमर काळंगे यांनी व्यक्त केले.
पोलीस उपनिरीक्षक धनंजय गाडे म्हणाले की, विद्यार्थ्यांना स्पर्धेच्या युगामध्ये टिकायचे असेल तर विद्यार्थ्यांनी आपले ध्येय निश्चित करून ते प्राप्त करण्यासाठी एकाग्रपणे अभ्यास करायला पाहिजे. तर प्रश्नमंजुषा स्पर्धेने विद्यार्थ्यांमध्ये ज्ञानार्जनाची प्रेरणा जागृत केली असून, शिक्षण क्षेत्रात नवीन दृष्टिकोन निर्माण करण्यासाठी हा उपक्रम उपयुक्त ठरणार असल्याचे मत प्राचार्य डॉ.सुरेश साळुंखे यांनी व्यक्त केले.
कार्यक्रमाचे अध्यक्ष रयत शिक्षण संस्थेचे पश्चिम विभागीय चेअरमन आमदार चेतन (दादा) तुपे पाटील, रयत शिक्षण संस्थेचे जनरल बॉडी सदस्य दिलीप (आबा) तुपे पाटील व महाविद्यालय विकास समितीचे सदस्य अमर तुपे यांनी कार्यक्रमासाठी शुभेच्छा दिल्या. महाविद्यालयाचे प्राचार्य डॉ. सुरेश साळुंखे यांच्या मार्गदर्शनाखाली पद्मभूषण डॉ. कर्मवीर भाऊराव पाटील राज्यस्तरीय महाविद्यालयीन प्रश्नमंजूषा स्पर्धा-२०२५ चे आयोजन करण्यात आले होते. कार्यक्रमाचे संयोजन डॉ.शहाजी करांडे, डॉ.अतुल चौरे, प्रा.ऋषिकेश खोडदे यांनी केले. कार्यक्रमासाठी महाराष्ट्रातील विविध महाविद्यालयातील ४० विद्यार्थ्यांनी सहभाग नोंदवला. यावेळी कर्मवीर विद्याप्रबोधिनीचे नरेश पवार, उपप्राचार्य डॉ.किशोर काकडे, उपप्राचार्य प्रा.संजय जडे, उपप्राचार्य डॉ.संजय जगताप, महाविद्यालयातील प्राध्यापक आणि विद्यार्थी मोठ्या संख्येने उपस्थित होते. कार्यक्रमाचे प्रास्ताविक डॉ.अतुल चौरे, पाहुण्यांची ओळख डॉ.शहाजी करांडे तर आभार उपप्राचार्य डॉ.संजय जगताप यांनी केले. कार्यक्रमाचे सूत्रसंचालन डॉ.नम्रता कदम, प्रा.नयना शिंदे यांनी केले.
