पुणे : कोथरुड येथे कसबा पेठेतील रहिवासी अक्षय राजन लोणकर (वय 29) याच्यावर झालेल्या हल्ल्याच्या हाफ मर्डर प्रकरणातील एका आरोपीला न्यायालयाने अटकपूर्व जामीन मंजूर केला आहे. सम्राट विजय सणस (वय 27, रा. कोथरूड) असे अटकपूर्व जामीन मिळालेल्याचे नाव आहे.
घटनेचा तपशील असा की, ३ ऑगस्ट रोजी अक्षय लोणकर आपल्या मित्रासह ‘शिवसमर्थ बँक्वेट हॉल’ येथे लग्न सोहळ्यास गेले होते. त्यानंतर अन्न शोधण्यासाठी तो ‘कॉफी अँड मोअर’ दुकानासमोर थांबला असता आरोपी रिक्षाचालकासोबत किरकोळ वाद झाला. या वादाचे रूपांतर भांडणात झाले. त्यावेळी आरोपींनी शिवीगाळ करून लोणकर याला हाताने व नंतर धारदार शस्त्राने डोक्यावर हल्ला केला. त्याचा मित्र ललित आढाव यालाही गंभीर दुखापत झाली. स्थानिकांनी हस्तक्षेप करून भांडण थांबवले. जखमींवर ससून हॉस्पिटलमध्ये उपचार करण्यात आले. वैद्यकीय तपासणीत लोणकरच्या नाकाला फ्रॅक्चर झाल्याचे निष्पन्न झाले.
घटनेनंतर कोथरूड पोलीस ठाण्यात गुन्हा दाखल झाला. उपनिरीक्षक चेतन धनवडे यांनी तपास सुरू केला. आरोपींनी न्यायालयात अटकपूर्व जामिनासाठी अर्ज केला. सरकारी वकीलांनी आरोपींना जामीन नाकारावा, अशी मागणी केली होती. मात्र बचाव पक्षाचे ॲड. स्वप्निल पाटील यांनी घटनेतील विसंगती मांडून आरोपींना निर्दोष मानावे, असा युक्तिवाद केला. दोन्ही बाजूंचे युक्तिवाद ऐकल्यानंतर न्यायालयाने ठराविक अटींसह आरोपी सम्राट सणस याचा अटकपूर्व जामीन मंजूर केला.
या खटल्यात ॲड. परमेश्वर काकडे, ॲड. योगेश काकडे, ॲड. विश्वजीत शिंदे, ॲड. सिद्धी लाटमे पाटील, ॲड. गणेश काळे, ॲड. मयुर मराठे व ॲड. विनय वजरिनकर यांनी बचाव पक्षाला सहकार्य केले.
