लोणी काळभोर प्रतिनिधी – लोणी काळभोर पोलीस स्टेशन येथील गणपतीचे विसर्जन मिरवणुकीत डीजे व गुलाल यांचा वापर कटाक्षाने टाळून व पारंपारिक वाद्यांच्या गजरात झाल्यामुळे राज्यात कुतुहलाचा विषय झालेला आहे .गणपतीची विसर्जन मिरवणूक म्हणले की डीजे गुलाल यांचा वारेमापवापर होत असून त्यामुळे सर्वत्र वातावरण दूषित होत असे याला छेद देत लोणी काळभोर पोलीस स्टेशनने यावर्षी ढोल ,ताशा ,लेझीम ,टाळ ,मृदुंग या पारंपारिक वाद्यांच्या गजरात मिरवणूक पार पडली.
मिरवणुकीला सकाळी अकरा वाजता पोलीस ठाण्यातआरती करून सुरुवात झाली. दत्त मंदिर ,गणपती मंदिर ,ग्रामपंचायत कार्यालय , छत्रपती शिवाजी महाराज उद्यान ,बाजार मैदान अशा प्रमुख ठिकाणावरून येऊन ग्रामपंचायतीने बाजार मैदानावर तयार केलेल्या कृत्रिम हौदात महिलांच्या हस्ते गणपतीचे विसर्जन करण्यात आले .यावेळी कन्या शाळेतील मुलींची लेझीम , महिला पोलीस कर्मचाऱ्यांची फुगडी ,वारकरी शिक्षण संस्थेच्या हरीपाठाचे सूर यामुळे वातावरण मंत्रमुग्ध झाले .तसेच पोलिसांच्या बँड मास्टर पथकाने उपस्थितांना ठेका धरायला लावला . यामुळे लोणी काळभोर पोलिसांनी समाजापुढे एक आदर्श निर्माण केला असून ही मिरवणूक राज्यातील सर्व मंडळासाठी आदर्श ठरेल अशी नागरिकांनी प्रतिक्रिया दिली .
