लोणी काळभोर – हडपसर येथील एस.एम. जोशी महाविद्यालयाच्या विद्यार्थ्यांनी २०२४-२५ या शैक्षणिक वर्षात विविध सामाजिक उपक्रमांचे आयोजन केले. विद्यार्थ्यांनी धर्मवीर शंभूराजे अनाथाश्रमाला भेट देऊन तेथील मुलांना संगणकाचे विविध भाग समजावून सांगितले. तसेच, त्यांना प्रेरणादायी चित्रफीत दाखवण्यात आली. ज्यामुळे त्यांच्या जिद्द आणि आत्मविश्वासाला चालना मिळाली.
गडितळ येथे ‘घरटे प्रकल्प’ अंतर्गत संवादात्मक आणि कौशल्यवर्धन उपक्रम राबवण्यात आले. यामध्ये विद्यार्थ्यांना मायक्रोसॉफ्ट पेंट, एक्सेल आणि वर्ड यांसारख्या संगणक सॉफ्टवेअरचा वापर शिकवण्यात आला.
महत्मा फुले माध्यमिक विद्यालयात विशेष कार्यशाळेचे आयोजन करण्यात आले. यामध्ये विद्यार्थ्यांसाठी कृत्रिम बुद्धिमत्ता (AI) आणि मशीन लर्निंग (ML) कार्यशाळा घेण्यात आली. तसेच, मुलांना स्क्रॅच अँप वापरण्याचे प्रशिक्षण देण्यात आले, ज्यामुळे त्यांना संगणकीय तंत्रज्ञानाची प्राथमिक माहिती मिळाली.
विद्यार्थ्यांनी समर्पण वृद्धाश्रमाला भेट देऊन तेथील आजी-आजोबांशी संवाद साधला. त्यांच्या मनोरंजनासाठी विशेष कार्यक्रमांचे आयोजन करण्यात आले, ज्यामुळे वृद्धाश्रमातील रहिवाशांना आनंद मिळाला.
या उपक्रमांमुळे विद्यार्थ्यांना सामाजिक भान, नेतृत्वगुण आणि तंत्रज्ञानासोबतच माणुसकीचे धडे मिळाले. महाविद्यालयाने घेतलेल्या या कार्यक्रमाचे सर्वत्र कौतुक होत आहे.
