हडपसर – सावित्रीबाई फुले पुणे विद्यापीठातील नामांकित रयत शिक्षण संस्थेचे, एस. एम. जोशी कॉलेजच्या प्राचार्यपदी डॉ.सुरेश साळुंखे यांची नियुक्ती करण्यात आली आह़े. त्यांच्या या नियुक्तीबद्दल रयत शिक्षण संस्थेचे चेअरमन चंद्रकांत दळवी, सचिव विकास देशमुख, संघटक डॉ. अनिल पाटील, पश्चिम विभागीय चेअरमन आमदार चेतन (दादा) तुपे, रयत शिक्षण संस्थेचे जनरल बॉडी सदस्य दिलीप (आबा) तुपे, महाविद्यालय विकास समितीचे सदस्य अमर तुपे यांनी त्यांचे अभिनंदन केले.
दहिवडी कॉलेजच्या सर्वांगीण विकासात त्यांनी योगदान देत कामाचा ठसा उमटविला आहे. त्यांनी दहिवडी महाविद्यालयात विविध उपक्रम राबविले. डी. सी. पॅटर्न, नियमित कोर्सबरोबरच वेगवेगळे शॉर्ट टर्म कोर्स सुरू केले. स्पर्धा परीक्षा केंद्र, आयसीटी क्लासरूम, ई- कंटेंट स्टुडिओ, कार्यालय इमारत नूतनीकरण, कॉमर्स विभागामध्ये दोन मजले वाढ, दोन कॉन्फरन्स हॉल तसेच सभागृह आदींच्या निर्मितीमध्ये डॉ. साळुंखे यांनी मोलाचे योगदान दिले.
डॉ. साळुंखे यांच्या मार्गदर्शनाखाली रयत शिक्षण संस्थेच्या ढोकमोडा येथील ५० एकर पडीक जमिनीत वृक्ष लागवड तसेच ज्वारी, बाजरी, मका, ऊस यांसारखी पिके घेतली गेली. महाविद्यालयाच्या कॅम्पस दोनमध्ये नारळ, बांबू, आवळा, पेरू, तुती, सीताफळ, चिक्कू, आंबा आदी तीन हजारहून अधिक झाडांची लागवड व संगोपन केले, तसेच १० हजारपेक्षा जास्त रोपांचे वाटप विद्यार्थ्यांना व परिसरातील वृक्षप्रेमींना करण्यात आले.
राष्ट्रीय मूल्यांकन आणि मान्यता परिषद (नॅक) यांच्याकडून अ++ ही श्रेणी मिळवून 2024 मध्ये केंद्र शासनाकडून पी. एम. उषा योजनेंतर्गत महाविद्यालयाला पाच कोटी रुपयांचे अनुदान प्राप्त करून देण्यात डॉ.साळुंखे यांचा सिंहाचा वाटा आहे. डॉ. साळुंखे यांची नॅकच्या बंगळूरस्थित कार्यालयाने नॅक पिअर टीमचे सदस्य म्हणून निवड केली आहे. महाविद्यालयीन, संस्थात्मक आणि विद्यापीठ स्तरावरील विविध समित्यांवर त्यांनी उत्कृष्ट काम केले आह़े. त्यांच्या कार्याची दखल घेवून त्यांना विविध पुरस्कारांनी सन्मानित केले आह़े.
त्यांच्या या निवडीबद्दल महाविद्यालयाचे प्र.प्राचार्य डॉ.किशोर काकडे, उपप्राचार्य प्रा.संजय जडे, उपप्राचार्य डॉ.संजय जगताप, आय.क्यू.ए.सी. समन्वयक डॉ.शहाजी करांडे, कार्यालयीन अधिक्षक शेखर परदेशी, महाविद्यालयातील सर्व प्राध्यापक, कार्यालयीन सेवक आणि विद्यार्थी इत्यादींनी त्यांचे अभिनंदन करीत त्यांना पुढील वाटचालीसाठी शुभेच्छा दिल्या.
