लोणी काळभोर प्रतिनिधी – आव्हाळवाडी ता. हवेली येथे सौ. पल्लवी युवराज काकडे यांच्या वतीने आयोजित करण्यात आलेल्या, सर्वरोग निदान मोफत महाआरोग्य शिबिरास स्थानिक नागरिकांचा मोठ्या प्रमाणात प्रतिसाद लाभला. या शिबिरामध्ये तब्बल १३८०हून अधिक नागरिकांनी सहभाग नोंदविला.
शिबिरादरम्यान ९००नागरिकांची डोळ्यांची तपासणी करण्यात आली असून त्यापैकी ७५३ नागरिकांना मोफत चष्म्यांचे वाटप करण्यात आले. तसेच ४७रुग्णांमध्ये मोतीबिंदूचे निदान झाले असून, या सर्वांवर आगामी काही दिवसांत मोफत शस्त्रक्रिया करण्यात येणार असल्याची माहिती आरोग्यदूत युवराज काकडे यांनी दिली. याशिवाय २नागरिकांना कृत्रिम हात व पाय मिळण्यासाठी नोंद केली.
या आरोग्य शिबिरात हृदय तपासणी, सर्वसाधारण आरोग्य तपासणी, दंत तपासणी, हाडांची तपासणी, स्त्रीरोग तपासणी, ईसीजी, हिमोग्लोबिन, शुगर चाचणी, रक्तदाब मापन तसेच कान-नाक-घसा तपासणी अशा विविध आरोग्य सेवांचा समावेश होता.
या शिबिरास पंचायत समितीचे माजी सदस्य सुरेशबापू सातव,माजी उपसरपंच मंगेश सातव, माजी उपसरपंच प्रशांत सातव, ग्रामपंचायत सदस्य अमोल आव्हाळे, युवानेते किरण आव्हाळे, संकेत आव्हाळे, नितीन आव्हाळे, हर्षल आव्हाळे, सुबोध सातव, निलेश सातव, विशाल कुटे इतर मान्यवर उपस्थित होते.
सौ. पल्लवी युवराज काकडे यांच्या सामाजिक बांधिलकीतून राबविण्यात आलेल्या या उपक्रमामुळे, आव्हाळवाडी परिसरातील नागरिकांना सर्वसमावेशक आरोग्यसेवा एका ठिकाणी उपलब्ध झाल्यामुळे, या आरोग्य शिबिराचे सर्वत्र कौतुक होताना दिसत आहे.
